சென்னை: சென்னை மாநகரின் அதிகரித்து வரும் குடிநீர் தேவையை பூர்த்தி செய்யும் நோக்கில் தமிழ்நாடு அரசு முன்வைத்துள்ள மாமல்லன் நீர்த்தேக்கத் திட்டம் மீனவர்களிடையே கடும் எதிர்ப்பை ஏற்படுத்தியுள்ளது. இந்தத் திட்டம் செயல்படுத்தப்பட்டால், தங்களின் பாரம்பரிய மீன்பிடி பகுதிகள் அழிந்து, 5,000-க்கும் மேற்பட்ட மீனவ குடும்பங்களின் வாழ்வாதாரம் பாதிக்கப்படும் என அவர்கள் அச்சம் தெரிவித்துள்ளனர்.   சென்னை அருகே கிழக்கு கடற்கரைச் சாலை (ECR) மற்றும் பழைய மகாபலிபுரம் சாலை (OMR) இடையே 5,161 ஏக்கர் பரப்பளவில் இந்த நீர்த்தேக்கம் அமைக்கப்பட உள்ளது. முதல் கட்டமாக 4,375 ஏக்கரில் ரூ.342 கோடி மதிப்பில் பணிகள் தொடங்கப்பட்டுள்ளன. கடந்த ஜனவரி 19ஆம் தேதி இதற்கான அடிக்கல் நாட்டப்பட்டது.   அரசு தரப்பில், இந்த நீர்த்தேக்கத்தின் கொள்ளளவு 1.66 டிஎம்சி என்றும், தினமும் 170 மில்லியன் லிட்டர் குடிநீர் வழங்கப்படும் என்றும் தெரிவிக்கப்பட்டுள்ளது. இதன் மூலம் சோழிங்கநல்லூர், மேடவாக்கம், பள்ளிக்கரணை, சிறுசேரி, கேளம்பாக்கம், மாமல்லபுரம் உள்ளிட்ட பகுதிகளில் வசிக்கும் சுமார் 13 லட்சம் பேர் பயனடைவார்கள் என கூறப்பட்டுள்ளது.   ஆனால், இந்தப் பகுதி நன்னீரும் கடல்நீரும் கலக்கும் கழுவெளி சூழலியல் அமைப்பைக் கொண்டது என்றும், இங்கு இறால், நண்டு உள்ளிட்ட மீன்வளமும் வலசைப் பறவைகளும் சார்ந்த உயிரியல் அமைப்பு உள்ளது என்றும் சூழலியல் ஆர்வலர்கள் சுட்டிக்காட்டுகின்றனர். தேவையான அறிவியல் தாக்க மதிப்பீட்டு ஆய்வுகள் முழுமையாக மேற்கொள்ளப்படாமல் திட்டத்திற்கு அனுமதி வழங்கப்பட்டுள்ளதாகவும் குற்றச்சாட்டு முன்வைக்கப்படுகிறது.   மீனவர்கள் தரப்பில், “வேறு இடங்களில் நீர்த்தேக்கம் அமைக்கலாம். ஆனால் 5,000 குடும்பங்களின் வாழ்வாதாரத்தை அழித்து இங்கே அமைப்பது நியாயமல்ல” என்று தெரிவிக்கின்றனர். கடலுக்கு செல்வதைவிட, இந்த உள்நாட்டு நீர்நிலைகளே தங்களின் முக்கிய வருமான ஆதாரம் என்றும் அவர்கள் கூறுகின்றனர்.   இதற்கு பதிலளித்துள்ள தமிழ்நாடு அரசு, குடிநீர் தேவை, வெள்ளத் தடுப்பு மற்றும் நிலத்தடி நீர்மட்டத்தை உயர்த்துவது ஆகிய மூன்று முக்கிய நோக்கங்களுக்காகவே இந்தத் திட்டம் கொண்டு வரப்பட்டுள்ளதாக விளக்கமளித்துள்ளது. மேலும், பக்கிங்ஹாம் கால்வாய் சீரமைப்பு உள்ளிட்ட நடவடிக்கைகள் மூலம் மீனவர்களின் வாழ்வாதாரம் பாதிக்கப்படாது என உறுதியளிக்கப்பட்டுள்ளது.   இந்த நிலையில், திட்டத்தை கைவிட வேண்டும் என கிராம சபை தீர்மானங்கள் நிறைவேற்றப்பட்டுள்ளதுடன், சட்ட நடவடிக்கைகளையும் பரிசீலித்து வருவதாக மீனவர்கள் தெரிவிக்கின்றனர். மாமல்லன் நீர்த்தேக்கத் திட்டம் தொடர்பான விவகாரம், குடிநீர் தேவையும் வாழ்வாதார உரிமைகளும் மோதும் முக்கிய விவாதமாக மாறியுள்ளது.

சென்னையில் கடந்த 37 நாட்களாக தொடர்ந்து போராட்டத்தில் ஈடுபட்டு வந்த இடைநிலை பதிவுமூப்பு ஆசிரியர்கள், அரசின் உத்தரவாதத்தை ஏற்று தங்களின் போராட்டத்தை தற்காலிகமாக வாபஸ் பெற்றுள்ளனர். பள்ளிக்கல்வித் துறை அமைச்சருடன் நடைபெற்ற பேச்சுவார்த்தையைத் தொடர்ந்து இந்த முடிவு எடுக்கப்பட்டுள்ளது. சம வேலைக்கு சம ஊதியம் வழங்க வேண்டும் என்ற கோரிக்கையை முன்வைத்து, இடைநிலை பதிவுமூப்பு ஆசிரியர்கள் இயக்கத்தினர் கடந்த டிசம்பர் 26ஆம் தேதி முதல் சென்னையில் தொடர் போராட்டத்தில் ஈடுபட்டு வந்தனர். பள்ளிக்கல்வித் துறை அலுவலகம், மாவட்ட ஆட்சியர் அலுவலகம் உள்ளிட்ட பல்வேறு அரசு அலுவலகங்களை முற்றுகையிட்டு ஆசிரியர்கள் தங்களின் கோரிக்கையை வலியுறுத்தி வந்தனர். போராட்டம் 37 நாட்களாக நீடித்து வந்த நிலையில், பள்ளிக்கல்வித் துறை அமைச்சர் அளித்த உறுதியை தொடர்ந்து, ஆசிரியர்கள் போராட்டத்தை தற்காலிகமாக நிறுத்த முடிவு செய்துள்ளனர். மூவர் குழு அமைக்கப்பட்டு, அதன் அறிக்கை அரசிடம் தாக்கல் செய்யப்படும் வரை போராட்டத்தை இடைநிறுத்துவதாக ஆசிரியர் சங்கத்தினர் அறிவித்துள்ளனர். அமைச்சரின் அறிவுறுத்தலை ஏற்று போராட்டம் வாபஸ் பெறப்பட்டுள்ளதாக தெரிவித்துள்ள ஆசிரியர்கள், குழு அறிக்கையின் அடிப்படையில் அரசு உரிய நடவடிக்கை எடுக்காவிட்டால், மீண்டும் போராட்டம் தீவிரப்படுத்தப்படும் என்றும் எச்சரிக்கை விடுத்துள்ளனர்.

தமிழகத்தில் வாக்காளர் பட்டியலில் பெயர் சேர்ப்பதற்காக வழங்கப்பட்ட நீட்டிக்கப்பட்ட கால அவகாசம் நாளை (வெள்ளிக்கிழமை) உடன் முடிவடைய உள்ளது. இதனால், இதுவரை விண்ணப்பிக்காதவர்கள் அவசரமாக விண்ணப்பிக்க வேண்டும் என தேர்தல் ஆணையம் அறிவுறுத்தியுள்ளது.   தமிழகத்தில் கடந்த நவம்பர் மாதம் முதல் வாக்காளர் பட்டியல் சிறப்பு தீவிர திருத்தப் பணிகள் நடைபெற்று வருகின்றன. இதன் ஒரு பகுதியாக, கடந்த டிசம்பர் மாதத்தில் வெளியிடப்பட்ட வரைவு வாக்காளர் பட்டியலில் சுமார் 97.38 லட்சம் வாக்காளர்களின் பெயர்கள் நீக்கப்பட்டிருந்தது பெரும் விவாதத்தை ஏற்படுத்தியது.   இதனைத் தொடர்ந்து, பெயர் நீக்கப்பட்டவர்கள் மீண்டும் தங்களது பெயரைச் சேர்த்துக் கொள்ளவும், புதிய வாக்காளர்கள் பதிவு செய்யவும் தேர்தல் ஆணையம் கூடுதல் அவகாசம் வழங்கியது. அந்த அவகாசம் தற்போது இறுதி கட்டத்தை எட்டியுள்ளது.   தேர்தல் ஆணையத்தின் தகவலின்படி, இதுவரை 16 லட்சத்து 2 ஆயிரத்து 555 பேர் வாக்காளர் பட்டியலில் பெயர் சேர்க்க விண்ணப்பம் அளித்துள்ளனர். இந்த விண்ணப்பங்கள் பரிசீலனை செய்யப்பட்டு, இறுதி வாக்காளர் பட்டியல் அடுத்த மாதம் 17ஆம் தேதி வெளியிடப்பட உள்ளது.   இதனால், இன்னும் பெயர் பதிவு செய்யாதவர்கள், நாளைக்குள் ஆன்லைன் அல்லது அருகிலுள்ள தேர்தல் அலுவலகம் மூலம் விண்ணப்பிக்க வேண்டும் என அதிகாரிகள் அறிவுறுத்தியுள்ளனர்.

எடை குறைப்பு என்ற பெயரில் நடந்த விபரீதம் – மதுரை மாணவியின் மரணம்; ஆயுஷ், மருந்து கட்டுப்பாட்டு துறை கடும் எச்சரிக்கை மதுரையில் இளம் மாணவி ஒருவர் உயிரிழந்த சம்பவம், சமூக வலைதளங்களில் பரவும் தவறான உடல்நல ஆலோசனைகளின் ஆபத்தை மீண்டும் வெளிச்சத்துக்கு கொண்டு வந்துள்ளது. உடல் எடையை குறைக்க முயன்ற நிலையில், வெங்காரம் என்ற பொருளை உட்கொண்டதால் ஏற்பட்ட உடல்நலக் கோளாறு காரணமாக மாணவி உயிரிழந்ததாக தகவல்கள் தெரிவிக்கின்றன.   மதுரை செல்லூர் அருகே உள்ள மீனாம்பாள்புரம் பகுதியைச் சேர்ந்த கலையரசி (19), அரசு உதவி பெறும் மகளிர் கல்லூரியில் இளங்கலை இரண்டாம் ஆண்டு பயின்று வந்தார். சிறுவயதிலிருந்தே உடல் பருமன் இருந்ததால், எடையை குறைக்க வேண்டும் என்ற எண்ணத்தில், யூடியூப் உள்ளிட்ட சமூக வலைதளங்களில் வெளியாகும் வீடியோக்களை அவர் தொடர்ந்து பார்த்து வந்ததாக கூறப்படுகிறது.   அந்த வகையில், ஒரு வீடியோவில் கூறப்பட்ட ஆலோசனையை நம்பி, அருகிலுள்ள நாட்டு மருந்துக் கடையில் வாங்கிய வெங்காரத்தை கலையரசி உட்கொண்டுள்ளார். இதன் பின்னர், அவருக்கு வாந்தி, வயிற்றுப்போக்கு உள்ளிட்ட கடுமையான உடல்நல பாதிப்புகள் ஏற்பட்டன. உடனடியாக தனியார் மருத்துவமனையில் அனுமதிக்கப்பட்டு முதலுதவி அளிக்கப்பட்ட பிறகு வீடு திரும்பிய நிலையில், அதே இரவு மீண்டும் உடல்நிலை மோசமடைந்தது. பின்னர் ராஜாஜி அரசு மருத்துவமனைக்கு அழைத்துச் செல்லப்பட்டபோதும், அவரை காப்பாற்ற முடியவில்லை.   இந்த சம்பவம் தொடர்பாக செல்லூர் காவல் நிலையத்தில் வழக்குப் பதிவு செய்யப்பட்டு விசாரணை நடைபெற்று வருகிறது. இதனிடையே, சம்பவத்திற்கு காரணமான நாட்டு மருந்துக் கடை மற்றும் சமூக வலைதள சேனல்கள் மீது நடவடிக்கை எடுக்க வேண்டும் என்ற கோரிக்கைகள் எழுந்துள்ளன.   இந்த விவகாரம் குறித்து ஆயுஷ் மருந்து கட்டுப்பாட்டு இயக்ககம் பொதுமக்களுக்கு முக்கிய எச்சரிக்கையை விடுத்துள்ளது. சமூக வலைதளங்களில் பரவும் பாரம்பரிய மருத்துவ குறிப்புகள், எடை குறைப்பு டிப்ஸ் போன்றவற்றை மருத்துவர் ஆலோசனை இல்லாமல் பின்பற்ற வேண்டாம் என அறிவுறுத்தப்பட்டுள்ளது. முகவரி, பதிவு விவரம் இல்லாத விளம்பரங்களை நம்புவது ஆபத்தானது என்றும் தெரிவிக்கப்பட்டுள்ளது.   ஆயுஷ் துறை அதிகாரிகள் கூறுகையில், “சமூக வலைதளங்களில் போலி முகவரி, தொடர்பு விவரம் இல்லாத விளம்பரங்கள் அதிகரித்து வருகின்றன. இதனால் நடவடிக்கை எடுப்பது சவாலாக உள்ளது. பொதுமக்கள் இதுபோன்ற தகவல்களை நம்பாமல், அரசு மருத்துவமனைகள் அல்லது ஆரம்ப சுகாதார நிலையங்களில் உள்ள அங்கீகரிக்கப்பட்ட சித்த மருத்துவர்களிடம் ஆலோசனை பெற வேண்டும்” என தெரிவித்துள்ளனர்.   எடை குறைப்பு, ஆண்மை குறைபாடு உள்ளிட்ட பிரச்சனைகளை முன்வைத்து சமூக வலைதளங்களில் தொடர்ந்து பரவும் விளம்பரங்கள், குறிப்பாக இளைஞர்கள் மத்தியில் தவறான புரிதலை உருவாக்கக்கூடும் என சுகாதார நிபுணர்கள் எச்சரிக்கின்றனர். கலையரசியின் மரணம், இந்த ஆபத்துகளை உணர்த்தும் ஒரு துயரமான எடுத்துக்காட்டாக பார்க்கப்படுகிறது.

மதுரை: பொங்கல் பண்டிகையை முன்னிட்டு இன்று (ஜனவரி 15) காலை அவனியாபுரத்தில் நடைபெற்ற ஜல்லிக்கட்டு போட்டி மாலை பிற்பகல் மிகப் பெரும் உற்சாகத்துடன் நிறைவடைந்தது. இந்நிகழ்ச்சியை பத்திரப் பதிவு மற்றும் வணிக வரித் துறை அமைச்சர் பி. மூர்த்தி கொடியசைத்து தொடங்கி வைத்தார். 1,100 இடம் பெற்ற காளைகள் மற்றும் சுமார் 600 வீரர்கள் இதில் பங்கேற்றனர். மாதுழியில், வலையங்குளத்தை சேர்ந்த பாலமுருகன் 22 காளைகளை அடக்கி முதல் பரிசை வென்றார், அவருக்கு ரூ. 8 லட்சம் மதிப்புள்ள கார் பரிசாக வழங்கப்பட்டது. அடுத்ததாக 17 காளைகளை அடக்கிய அவனியாபுரத்தை சேர்ந்த கார்த்தி இரண்டாம் இடத்தைப் பிடித்தார், மேலும் 16 காளைகளை அடக்கிய அவனியாபுரத்தை சேர்ந்த ரஞ்சித்குமார் மூன்றாம் இடத்துக்குச் சேர்ந்தார். மேலும், ஜல்லிக்கட்டில் சிறந்த காளையாக விறுமாண்டி சகோதரர்களின் “முத்து கருப்பன்” காளை தேர்வு செய்யப்பட்டது, அதற்குரிய உரிமையாளருக்கு டிராக்டர் பரிசு வழங்கப்பட்டது. இவ்வாறு பொங்கல் பண்டிகையின் ஒரு பகுதியாக கோலாகலமாக நடைபெற்ற இந்த ஜல்லிக்கட்டு நிகழ்ச்சி நிறைவு பெற்றது, இதில் பல வீரர்கள் உற்சாகத்துடன் களத்தில் பங்கேற்றனர்.

சென்னையின் வரலாற்று மற்றும் பண்பாட்டு அடையாளங்களை ஒரே நாளில் காணும் வகையில், ‘சென்னை உலா’ என்ற புதிய சுற்றுலா பேருந்து சேவை அறிமுகப்படுத்தப்பட்டுள்ளது. மாநகர் போக்குவரத்துக் கழகம் சார்பில் தொடங்கப்பட்ட இந்த சேவையை, போக்குவரத்து துறை அமைச்சர் சிவசங்கர் கொடியசைத்து தொடங்கி வைத்தார். இந்த பேருந்து சேவை, சுமார் 25 ஆண்டுகளுக்கு முந்தைய வின்டேஜ் வடிவமைப்பில் உருவாக்கப்பட்டுள்ளது. மெரினா கடற்கரை, மயிலாப்பூர், எழும்பூர் அரசு அருங்காட்சியகம் உள்ளிட்ட சென்னையின் 17 முக்கிய பாரம்பரிய இடங்களை இணைக்கும் வகையில் வழித்தடம் அமைக்கப்பட்டுள்ளது. ரூ.50 டிக்கெட்டில் நாள் முழுவதும் பயணம் இந்த சேவையில் பயணிக்க, 50 ரூபாய் கட்டணத்தில் ஒரு நாள் டிக்கெட் பெறலாம். அந்த டிக்கெட்டை பயன்படுத்தி, குறிப்பிட்ட நிறுத்தங்களில் விருப்பப்படி ஏறி இறங்கி, முழு நாளும் சுற்றிப் பார்ப்பதற்கான வசதி வழங்கப்பட்டுள்ளது. இயக்க நேரம் ‘சென்னை உலா’ பேருந்துகள் • வார நாட்களில்: மாலை 4 மணி முதல் இரவு 10 மணி வரை • வார இறுதி நாட்களில்: காலை 10 மணி முதல் இரவு 10 மணி வரை இயக்கப்படவுள்ளதாக போக்குவரத்துக் கழகம் தெரிவித்துள்ளது. வரலாற்றுத் தகவல்களுடன் பயணம் இந்த சேவையின் சிறப்பம்சமாக, பேருந்தின் உள்ளே சென்னை மாநகரின் பழமையான சின்னங்கள் மற்றும் முக்கிய இடங்களின் புகைப்படங்கள் காட்சிப்படுத்தப்பட்டுள்ளன. மேலும், ஒவ்வொரு நிறுத்தத்தையும் அணுகும் முன், அந்த இடத்தின் வரலாறு குறித்து தமிழ் மற்றும் ஆங்கில மொழிகளில் ஒலிபெருக்கி மூலம் விளக்கங்கள் வழங்கப்படுகின்றன. தொடக்க விழாவில், அமைச்சர் சிவசங்கர் தானும் இந்த பேருந்தில் பயணம் செய்து, தலைமைச் செயலகம் வரை சென்றார். இந்த புதிய முயற்சி, சென்னை வரலாற்றை பொதுமக்களும் சுற்றுலாப் பயணிகளும் எளிதாக அறிந்துகொள்ள உதவும் திட்டமாக பாராட்டுகளை பெற்றுள்ளது.

விருத்தாசலம் பகுதியில் டீக்கடையில் மயங்கி விழுந்த ஒன்றரை வயது குழந்தையை, காவலரின் அதிரடி செயல்பாடு காப்பாற்றிய சம்பவம் பொதுமக்கள் மத்தியில் பெரும் பாராட்டுகளைப் பெற்றுள்ளது. இந்த சம்பவத்தின் சிசிடிவி காட்சிகள் தற்போது சமூக வலைதளங்களில் வேகமாக பரவி வருகின்றன. கடலூர் மாவட்டம் விருத்தாசலம் பெரியார் நகரில் உள்ள குளிர்பானக் கடையில், ஒரு பெண்மணி தனது ஒன்றரை வயது குழந்தையுடன் அமர்ந்து டீ குடித்துக் கொண்டிருந்தார். அச்சமயம், குழந்தை திடீரென மயங்கி கீழே சரிந்து விழுந்து, மூச்சு திணறி சுயநினைவு இழந்ததாக கூறப்படுகிறது. இதைக் கண்டு தாய் அலறியபோதும், அருகிலிருந்தவர்கள் என்ன செய்வது என்று குழம்பிய நிலையில் இருந்தனர். அந்நேரத்தில் கடைக்குள் வந்த விருத்தாச்சலம் காவல் நிலையத்தில் பணிபுரியும் தலைமை காவலர் சரவணன், எந்த தாமதமும் இன்றி குழந்தையை தூக்கிக்கொண்டு, சுமார் அரை கிலோ மீட்டர் தூரத்தில் உள்ள காமாட்சி தனியார் மருத்துவமனைக்கு ஓடிச்சென்று கொண்டு சென்றார். மருத்துவமனையில் உடனடியாக அளிக்கப்பட்ட முதலுதவி சிகிச்சையால், குழந்தை மீண்டும் சுயநினைவு பெற்று உயிர் தப்பியது. இந்த சம்பவம் தொடர்பான சிசிடிவி வீடியோ வெளியாகி, காவலர் சரவணனின் மனிதாபிமான செயல் அனைவரையும் நெகிழச் செய்துள்ளது. சமூக வலைதள பயனர்கள் மட்டுமின்றி பல தரப்பினரும் அவருக்கு பாராட்டு தெரிவித்து வருகின்றனர்.

விஜய் நடித்த ‘ஜனநாயகன்’ திரைப்படம் தொடர்பான தணிக்கை சர்ச்சையில், காங்கிரஸ் தலைவர் ராகுல் காந்தி வெளிப்படையாக ஆதரவு தெரிவித்துள்ளது அரசியல் வட்டாரங்களில் பல்வேறு விவாதங்களை கிளப்பியுள்ளது. இந்த ஆதரவு வெறும் கருத்துச் சுதந்திரத்துக்கான குரலா, அல்லது எதிர்வரும் தேர்தலைக் கணக்கில் கொண்ட நடவடிக்கையா என்ற கேள்விகள் எழுந்துள்ளன. மத்திய அரசின் நடவடிக்கையை தமிழ் பண்பாடு மற்றும் மக்களின் உரிமைகளுக்கு எதிரான செயலாகக் கருதி, ராகுல் காந்தி கடுமையாக விமர்சனம் செய்துள்ளார். தமிழ் மக்களின் குரலை அடக்க முயன்றால் அது ஒருபோதும் வெற்றி பெறாது என்றும் அவர் கூறியதாக தகவல்கள் வெளியாகின. ஏற்கனவே காங்கிரஸ் கட்சியின் பல தலைவர்கள் விஜய்க்கு ஆதரவாக கருத்து தெரிவித்த நிலையில், ராகுல் காந்தியின் இந்த நிலைப்பாடு அரசியல் முக்கியத்துவம் பெற்றதாக பார்க்கப்படுகிறது. ஒருபுறம் திமுக கூட்டணிக்குள் அதிக அரசியல் பங்கு வேண்டுமென காங்கிரஸ் வலியுறுத்தி வரும் நிலையில், மற்றொரு புறம் ‘ஜனநாயகன்’ விவகாரத்தில் விஜய்க்கு ஆதரவாக பேசுவது, 2026 தேர்தலை முன்னிட்டு தவெகவுடன் கூட்டணி அமைக்கும் முயற்சியா என்ற சந்தேகத்தையும் உருவாக்கியுள்ளது. ஆனால், இந்த விவகாரத்தில் ஆதரவு தெரிவித்த அனைவருக்கும் நன்றி கூறிய தவெக இணைப் பொதுச்செயலாளர் நிர்மல் குமார், காங்கிரஸ் குறித்த தங்களது முந்தைய நிலைப்பாட்டில் எந்த மாற்றமும் இல்லை என்று தெளிவுபடுத்தியுள்ளார். இதனால், காங்கிரஸ் விருப்பம் இருந்தாலும், தவெக தரப்பில் கூட்டணிக்கு தயக்கம் இருப்பதாக அரசியல் வட்டாரங்கள் கருதுகின்றன. மேலும், ராகுல் காந்தியின் ஆதரவு தேர்தல் கணக்குக்காக மட்டும் அல்ல என்றும் மற்றொரு கோணத்தில் பேசப்படுகிறது. ‘ஜனநாயகன்’ தணிக்கை விவகாரம், கரூர் தொடர்பான சிபிஐ விசாரணை போன்ற பிரச்சினைகள் மூலம் மத்திய அரசின் அழுத்தம் அதிகரிக்கலாம் என்பதால், விஜய் அரசியல் ரீதியாக தனிமைப்படாமல் இருக்க, வெளியிலிருந்தும் ஆதரவு இருப்பதை உணர்த்தும் முயற்சியே இந்த காங்கிரஸ் ஆதரவு எனவும் கூறப்படுகிறது. இதன் மூலம், விஜய் பாஜக பக்கம் நகராமல் இருக்க ஒரு சமநிலை அரசியல் அணுகுமுறையாக ராகுல் காந்தியின் இந்த நிலைப்பாடு இருக்கலாம் என்ற கருத்தும் பரவலாக விவாதிக்கப்படுகிறது.

மயிலாடுதுறை அருகே போலீசாரை கத்தியால் தாக்கிய நபர் பயத்தில் தூக்கிட்டு தற்கொலை – பரபரப்பு மயிலாடுதுறை மாவட்டம் குத்தாலம் ஒன்றியத்திற்குட்பட்ட மேலமங்கைநல்லூர் கிராமம் மேலத்தெருவில் நேற்று இரவு பரபரப்பான சம்பவம் நடைபெற்றது. குடிபோதையில் ஒருவர் அரிவாளுடன் பொதுமக்களை மிரட்டுவதாக பெரம்பூர் காவல் நிலையத்திற்கு தகவல் கிடைத்தது. தகவலின் பேரில், முதல் நிலைக் காவலர் சுவாமிநாதன் மற்றும் உளவு பிரிவு காவலர் சதீஷ் ஆகியோர் சம்பவ இடத்திற்கு விரைந்து சென்றனர். அங்கு அந்த நபரிடம் இருந்த சிறிய அரிவாளை போலீசார் பறிமுதல் செய்தனர். இதனைத் தொடர்ந்து, அவர் இடுப்பில் மறைத்து வைத்திருந்த கத்தியை திடீரென எடுத்து போலீசாரை தாக்க முயன்றார். அவரை பிடிக்க முயன்ற போது, முதன்மை காவலர் சுவாமிநாதனின் கட்டைவிரலில் காயம் ஏற்பட்டதுடன், உளவு பிரிவு காவலர் சதீஷின் வயிற்றுப் பகுதியில் லேசான கத்திக்குத்து விழுந்தது. பின்னர் இரு போலீசாரையும் கீழே தள்ளிவிட்டு அந்த நபர் அங்கிருந்து தப்பி ஓடினார். காயமடைந்த போலீசார் இருவரும் தனியார் மருத்துவமனையில் சிகிச்சை பெற்று, தையல் போடப்பட்டு வீடு திரும்பினர். இதனிடையே, போலீசாரை கத்தியால் தாக்கி தப்பிய நபர் மேலத்தெருவைச் சேர்ந்த ஆனந்தன் (40) என்பது தெரியவந்தது. லாரி டிரைவரான இவர், மனைவியின் ஊரான மேலமங்கைநல்லூரில் வசித்து வந்ததாகவும், ஒரு மகன் மற்றும் ஒரு மகள் இருப்பதாகவும் போலீசார் தெரிவித்துள்ளனர். போலீசார் அவரை தீவிரமாக தேடி வந்த நிலையில், இன்று அதிகாலை ஆனந்தன் தனது வீட்டின் அருகிலுள்ள மரத்தில் தூக்கிட்டு தற்கொலை செய்து கொண்டது தெரியவந்தது. தகவலறிந்த போலீசார் அவரது உடலை கைப்பற்றி, திருவாரூர் அரசு மருத்துவக் கல்லூரி மருத்துவமனைக்கு உடற்கூராய்வுக்காக அனுப்பி வைத்தனர். இந்த சம்பவம் குறித்து மாவட்ட காவல் கண்காணிப்பாளர் ஸ்டாலின் இன்று காலை நேரில் சம்பவ இடத்திற்கு சென்று விசாரணை மேற்கொண்டார். போலீசாரை தாக்கி தப்பிய நபர் பின்னர் பயத்தில் தற்கொலை செய்து கொண்ட சம்பவம், அப்பகுதியில் பெரும் பரபரப்பை ஏற்படுத்தியுள்ளது.

உலகப் புகழ்பெற்ற அவனியாபுரம் ஜல்லிக்கட்டு போட்டி இன்று மதுரை மாவட்டத்தில் மிகுந்த உற்சாகத்துடன் நடைபெறுகிறது. தமிழர்களின் பாரம்பரிய விளையாட்டான ஜல்லிக்கட்டில் பங்கேற்க உள்ள வீரர்களும் காளைகளும் முழுமையாக தயாராக உள்ளனர். இந்த போட்டியில் ஆயிரக்கணக்கான காளைகள் பங்கேற்க உள்ளதாகவும், நூற்றுக்கணக்கான வீரர்கள் களமிறங்க உள்ளதாகவும் அதிகாரிகள் தெரிவித்துள்ளனர். போட்டி நடைபெறும் வாடிவாசலில் பாதுகாப்பு ஏற்பாடுகள் பலப்படுத்தப்பட்டுள்ளன. காளைகளுக்கும் வீரர்களுக்கும் மருத்துவ பரிசோதனைகள் முன்னதாகவே மேற்கொள்ளப்பட்டுள்ளன. பார்வையாளர்களின் பாதுகாப்பை கருத்தில் கொண்டு காவல்துறை, தீயணைப்பு மற்றும் மருத்துவ குழுக்கள் தயார் நிலையில் வைக்கப்பட்டுள்ளன. மேலும், விதிமுறைகளை மீறாமல் போட்டி நடைபெற உறுதி செய்ய தேவையான அனைத்து நடவடிக்கைகளும் மேற்கொள்ளப்பட்டுள்ளதாக மாவட்ட நிர்வாகம் தெரிவித்துள்ளது. அவனியாபுரம் ஜல்லிக்கட்டு போட்டியை காண தமிழகம் முழுவதும் இருந்து ஏராளமான மக்கள் கூடுவார்கள் என எதிர்பார்க்கப்படுகிறது. இந்த போட்டி பொங்கல் திருநாளின் முக்கிய அம்சமாக விளங்குவதால், மக்களிடையே பெரும் உற்சாகம் காணப்படுகிறது.

தங்களது நீண்ட நாள் கோரிக்கைகளை நிறைவேற்ற வலியுறுத்தி, நாளை முதல் தீவிர போராட்டத்தை முன்னெடுக்க உள்ளதாக இளநிலை ஆசிரியர்கள் அறிவித்துள்ளனர். இந்த போராட்டத்திற்கு இளைஞர்கள் மற்றும் ஆசிரியர் சங்கங்கள் முழுமையான ஆதரவு அளித்து வருவதாகவும் அவர்கள் தெரிவித்துள்ளனர். ஊதிய மாற்றம், பணிநியமன நிரந்தரம், பதவி உயர்வு, பணிச்சுமை குறைப்பு உள்ளிட்ட கோரிக்கைகள் நீண்ட காலமாக நிலுவையில் உள்ளதாக இளநிலை ஆசிரியர்கள் குற்றம்சாட்டினர். பலமுறை மனுக்கள் மற்றும் போராட்டங்கள் நடத்தப்பட்டும், அரசு தரப்பில் இதுவரை தெளிவான நடவடிக்கை எடுக்கப்படவில்லை என்றும் அவர்கள் தெரிவித்தனர். இதனால், கோரிக்கைகள் நிறைவேறும் வரை போராட்டம் தொடரும் என்றும், மாநிலம் முழுவதும் ஆசிரியர்கள் ஒருங்கிணைந்து போராட்டங்களில் ஈடுபட உள்ளதாகவும் அறிவிக்கப்பட்டுள்ளது. இந்த போராட்டம் அமைதியான முறையில் நடைபெறும் என்றாலும், அரசு கவனிக்காவிட்டால் போராட்டம் மேலும் தீவிரமடையும் என்றும் எச்சரிக்கை விடுக்கப்பட்டுள்ளது. இளநிலை ஆசிரியர்களின் இந்த அறிவிப்பால் கல்வித் துறை மற்றும் அரசியல் வட்டாரங்களில் பரபரப்பு ஏற்பட்டுள்ள நிலையில், அரசு தரப்பில் இருந்து எவ்வகையான பதில் வரும் என்ற எதிர்பார்ப்பு அதிகரித்துள்ளது.