கர்நாடகாவின் மங்களூருவில் செயல்படும் Mangalore Refinery and Petrochemicals Limited நிறுவனம், கச்சா எண்ணெய் விநியோகம் பாதிக்கப்பட்டதால் மார்ச் மற்றும் ஏப்ரல் மாதங்களுக்கான பெட்ரோல் ஏற்றுமதி ஒப்பந்தங்களை நிறைவேற்ற முடியாது என அறிவித்துள்ளது. இதையடுத்து ‘ஃபோர்ஸ் மெஜூர்’ எனப்படும் சட்டப்பூர்வ அவசரநிலையை நிறுவனம் அறிவித்துள்ளது.

கச்சா எண்ணெய் விநியோகம் பாதிப்பு

மேற்கு ஆசியாவில் நிலவி வரும் போர் சூழல் மற்றும் Strait of Hormuz வழியாக வரும் கச்சா எண்ணெய் போக்குவரத்து தடையடைந்தது முக்கிய காரணமாகக் கூறப்படுகிறது.

இந்த பாதை வழியாக வளைகுடா நாடுகளில் இருந்து இந்தியாவுக்கு வரும் கச்சா எண்ணெய் விநியோகம் கடுமையாக பாதிக்கப்பட்டுள்ளதாக தகவல்கள் தெரிவிக்கின்றன.

ஏற்றுமதி ஒப்பந்தங்கள் பாதிப்பு

மங்களூருவில் செயல்படும் Mangalore Refinery and Petrochemicals Limited நிறுவனம் தனது மொத்த உற்பத்தியில் சுமார் 40 சதவீதத்தை வெளிநாடுகளுக்கு ஏற்றுமதி செய்து வருகிறது.

ஆனால் தற்போதைய கச்சா எண்ணெய் வரத்து குறைபாட்டால் சர்வதேச வாடிக்கையாளர்களுக்கு பெட்ரோல் வழங்க முடியாத நிலை ஏற்பட்டுள்ளதாக நிறுவனம் தெரிவித்துள்ளது.

‘ஃபோர்ஸ் மெஜூர்’ என்றால் என்ன?

‘ஃபோர்ஸ் மெஜூர்’ என்பது இயற்கை பேரிடர், போர் அல்லது மனித கட்டுப்பாட்டிற்கு அப்பாற்பட்ட சூழ்நிலைகளால் ஒப்பந்தத்தை நிறைவேற்ற முடியாதபோது பயன்படுத்தப்படும் சட்டப்பூர்வ விதியாகும்.

இந்த விதியை அறிவித்தால் ஒப்பந்தத்தை தற்காலிகமாக நிறுத்தியும் அபராதம் தவிர்த்தும் நிறுவனங்களுக்கு சட்டபூர்வ பாதுகாப்பு கிடைக்கும்.

இந்தியாவின் எரிபொருள் நிலை

இந்தியாவில் தற்போது சுமார் 25 நாட்களுக்கு போதுமான கச்சா எண்ணெய் மற்றும் எரிபொருள் இருப்பு உள்ளதாக அரசு வட்டாரங்கள் தெரிவித்துள்ளன.

மேலும் Russia மற்றும் Venezuela போன்ற நாடுகளிலிருந்து மாற்று வழிகளில் கச்சா எண்ணெய் பெற இந்தியா முயற்சித்து வருகிறது.

உள்நாட்டு விநியோகம் பாதிக்கப்படுமா?

MRPL அறிவிப்பு ஏற்றுமதி ஒப்பந்தங்களை மட்டுமே குறிக்கிறது என்றும், இந்தியாவின் உள்நாட்டு எரிபொருள் விநியோகத்திற்கு உடனடி பாதிப்பு இல்லை என்றும் அதிகாரிகள் தெரிவித்துள்ளனர்.

இதனால் பெட்ரோல் தட்டுப்பாடு ஏற்படும் என்ற அச்சம் தேவையில்லை என்றும், அடுத்த சில வாரங்களுக்கு போதுமான இருப்பு இருப்பதாகவும் உறுதி அளிக்கப்பட்டுள்ளது.